சமூக சேவை தொடர்பான படிப்புகள்!

''சமூக சேவை என்பது யார் வேண்டு மானாலும் செய்யலாம். ஆனால், அதையும் நேர்த்தியாகச் செய்வது எப்படி என்பதைக் கற்றுத் தருகின்றன சமூக சேவை தொடர்பான படிப்புகள். ஒரு இயற்கை பேரிடர் நடக்கும்போது அந்த இடத்தில் பாதிக்கப்பட்ட மக்களுக்கு என்னென்ன கஷ்டங்கள் ஏற்படும், அவர்களுக்கு எந்த வகையில் எல்லாம் உதவ வேண்டும் போன்ற ஒவ்வொரு விஷயங்களும் இந்த படிப்புகள் மூலம் கற்றுக் கொள்கிறார்கள் மாணவர்கள். 1952-ம் வருடம் தொடங்கப்பட்ட மெட்ராஸ் ஸ்கூல் ஆஃப் சோஷியல் வொர்க் தென் இந்தியாவில் சமூக சேவை தொடர்பான படிப்புகளுக்காக தொடங்கப்பட்ட முதல் கல்லூரி. இங்கு இருக்கும் அனைத்துப் படிப்புகளும் முதுகலைப் படிப்புகள். மாஸ்டர் ஆஃப் சோஷியல் வொர்க் (எம்.எஸ்.டபிஸ்யூ.), எம்.எஸ்.சி. கவுன்சிலிங் சைக்காலஜி, எம்.ஏ. மனிதவள மேம்பாடு, எம்.ஏ. என்.ஜி.ஓ. மேனேஜ்மென்ட், எம்.ஏ. ஹியூமன் ரிசோர்ஸ் அண்ட் ஆர்கனைசேஷன் டெவலப்மென்ட் போன்ற படிப்புகள் இருக்கின்றன. இவை அனைத்தும் சென்னை பல்கலைக்கழகத்தினால் அங்கீகரிக்கப்பட்டவை. இந்த படிப்புகளைப் பொறுத்தவரை, தியரி வகுப்புகளைவிட களப்பணிதான் அதிகமாக இருக்கும். அதாவது, வாரத்தில் இரண்டு நாட்கள் மட்டும்தான் வகுப்பறையில் பாடம் நடத்துவார்கள். மற்ற நாட்களில் களப்பணிக்குச் சென்று மக்களுக்கு சேவை செய்ய வேண்டும். வார இறுதியில் அவர்கள் மேற்கொண்ட களப்பணியின் ரிப்போர்ட்களை சமர்ப்பிக்க வேண்டும். எந்த வகையான டிகிரி முடித்தவர்களும் இந்த படிப்பில் சேரலாம். நுழைவுத் தேர்வின் மூலமே மாணவர்கள் தேர்வு செய்யப்படுவார்கள். நுழைவுத் தேர்வில் வாங்கும் மதிப்பெண் மற்றும் டிகிரியில் வாங்கிய சதவிகிதம் ஆகியவற்றைக் கணக்கிட்டு மெரிட்டில் மதிப்பெண் வாங்குகிறவர்களுக்கு அட்மிஷன் கிடைக்கும். வேலை வாய்ப்பு எப்படி? தற்போது சமூக சேவை என்பது புரொஃபஷனல் படிப்பாக அங்கீகரிக்கப் படுவதால் நல்ல வேலை வாய்ப்புகள் கிடைக்கின்றன. மருத்துவ மனோதத்துவம், தொழிற்சாலை மனோதத்துவம், குடும்ப நல நீதிமன்றங்கள், சமூக விழிப்புணர்வு, சுகாதாரத் துறை, மகளிர் மற்றும் குழந்தைகள் துறை, சி.எம்.டி.ஏ., என்.ஜி.ஓ. அமைப்புகள் போன்றவற்றில் இப்போது வேலைவாய்ப்புகள் குவிந்து கிடக்கின்றன. கேம்பஸ் இன்டெர்வியூ மூலம் மாணவர் களைத் தேர்வு செய்கின்றனர். இங்கு மட்டுமல்லாமல் வெளிநாடுகளில் சமூக சேவை தொடர்பான படிப்புக்கு நல்ல வாய்ப்புகள் கிடைக்கின்றன.''